7 хоногийн тойм: Хятадын хиймэл оюун ухааны өсөлт🤖 АНУ-ын зах зээлийн аюул?

Дотоод мэдээ

Манай хувьцаат компаниудын ногдол ашиг анх удаа 1 их наядыг давлаа.

• Монголын хөрөнгийн биржид бүртгэлтэй 39 компани нийт 1.18 их наяд төгрөгийн ногдол ашиг тараахаа албан ёсоор зарлаад байна.
• Хөрөнгийн зах зээлд үйл ажиллагаа явуулж байгаа хувьцаат компаниудын үнэт цаасны зах зээлийн нийт үнэлгээ тус хугацаанд 13.3 их наяд төгрөг болж, өмнөх оны мөн үеэс 2.2 их наяд төгрөгөөр өссөн байна.

Монгол Улсын Засгийн газар 500 сая ам.долларын бонд олон улсын зах зээлд гаргалаа.

• Монгол Улсын Засгийн газар таван жилийн хугацаатай, 500 сая ам.долларын “Century IV” бонд олон улсын зах зээлд гаргалаа. Бондын захиалга арилжаалах хэмжээнээс 8.2 дахин давж, хөрөнгө оруулагчдаас нийт 4.1 тэрбум ам.долларын захиалга ирсэн байна. Бондын хүү тооцоолсноос бага буюу 6.625 хувиар тогтжээ.
•  Засгийн газрын бондын эрэлт өндөр байгаа нь хөрөнгө оруулагчдын Монгол Улсын эдийн засагт итгэх итгэлийг харуулж байгаа юм. Улмаар энэ нь дотоодын аж ахуйн нэгжүүд олон улсын санхүүгийн зах зээлээс хямд өртөгтэй эх үүсвэр татах боломжийг нээж буй.

“Эрдэнэс Тавантолгой” ХК-н 750, 214 хувьцаатай иргэд 2024 оны ногдол ашигт хэдэн төгрөг авах вэ?

• “Эрдэнэс Тавантолгой” ХК нь 2024 онд 4.5 их наяд төгрөгийн цэвэр ашигтай ажилласнаа танилцуулсан.
• Нэгж хувьцаанд 326.5 төгрөгийн ногдол ашиг хуваарилах бөгөөд 1,072 хувьцаатай иргэн 350,008 төгрөгийн ногдол ашиг авна. Ногдол ашгийн урьдчилгаа  гэх 135,000 төгрөгийг дээрх дүнгээс хасаж тооцвол бүрэн хувьцаатай иргэд 215,008 төгрөгийн ногдол ашгаа энэ сарын 28-нд болон дөрөвдүгээр сард хоёр хуваан авна.
• Иргэдийн тухайд 750,214 гэх зэргээр харилцан адилгүй тооны хувьцаатай байгаа. Иймээс өөрт байгаа хувьцааны тоогоо 326.5 төгрөгөөр үржүүлж, өөрт ногдох  ногдол ашгийн хэмжээгээ мэдэж болох нь байна. (IKON)

Гадаад мэдээ

Хятадын зах зээл хүчирхэгжиж байна

Шинжээчдийн үзэж байгаагаар Хятадын хөрөнгийн зах зээлд хөрөнгө оруулалт хийх үндэслэл улам баталгаажиж байна. Энэ нь Ерөнхийлөгч Ши Жиньпиний бизнес эрхлэгчидтэй хийж буй уулзалтууд, хиймэл оюун ухааны салбарын хөгжүүлэлт, АНУ-ын татварын бодлогод хянуур хандсантай холбоотой. Хонг Конгийн Hang Seng индекс 3 жилийн дээд түвшинд хүрч, энэ жил 13.8%-иар өсжээ. Goldman Sachs-ийн тооцоогоор AI технологийн өргөн хэрэглээ нь компаниудын ашгийг нэмэгдүүлж, ойролцоогоор 200 тэрбум ам.долларын хөрөнгө оруулалтыг татах боломжтой.

Эх сурвалж: (REUTERS)

Глобал хөрөнгө оруулалтын стратегийн өөрчлөлт.

Дэлхийн хөрөнгө оруулагчид АНУ-ын зах зээлд төвлөрсөн хөрөнгө оруулалтаа дахин үнэлж байна. Учир нь АНУ-ын зах зээл хэт өндөр үнэлгээтэй байгаагаас гадна “America First” бодлоготой холбоотой тодорхойгүй байдал үргэлжилж байна. Үүний зэрэгцээ Европ, Хятадын эдийн засгийн нөхцөл сайжирч, Германд төсвийн бодлого зөөлөрч магадгүй гэсэн хүлээлттэй байна. Bank of America-ийн судалгаагаар АНУ-ын хувьцааны эзэмшил 12-р сараас хойш огцом буурсан бөгөөд хөрөнгө оруулагчдын 90% нь АНУ-ын хувьцааг хэт өндөр үнэлгээтэй гэж үзэж байна.

Эх сурвалж: (REUTERS)

Их Британийн инфляци ба зах зээлийн хариу үйлдэл.

Их Британийн инфляцийн түвшин 1-р сард 3%-д хүрч, шинжээчдийн таамаглаж байснаас өндөр гарлаа. Үүнд тээвэр, хүнсний үнэ өссөнөөс гадна хувийн сургуулийн төлбөрт НӨАТ нэмэгдсэн нь нөлөөлсөн байна. Үүний улмаас ойрын хугацаанд Төв банк хүүгийн түвшнийг бууруулах магадлал багасав. Үүний зэрэгцээ, Швейцарийн уул уурхайн Glencore компани гол хөрөнгийн биржийн бүртгэлээ Лондоноос Нью-Йорк руу шилжүүлэхийг судалж байна. Энэ нь илүү таатай үнэлгээ авах зорилготой юм.

Эх сурвалж: (GUARDIAN)

Дүгнэлт

• Хятадын зах зээл хиймэл оюун ухааны салбарын өсөлт, засгийн газрын дэмжлэгийн үр дүнд олон улсын хөрөнгө оруулагчдын анхаарлыг татаж байна.
• Хэрэв дэлхийн хөрөнгө оруулагчид Хятад болон Европын зах зээлд илүү их хөрөнгө төвлөрүүлэх хандлагатай болвол, энэ нь АНУ-ын зах зээлийн хөрвөх чадварт сөргөөр нөлөөлж болзошгүй.

Эдгээр хүчин зүйлүүд нь дэлхийн хөрөнгийн зах зээлийн хөрөнгө оруулалтын чиг хандлага, эрсдэлийн хуваарилалт, мөнгөний урсгалд томоохон өөрчлөлт авчрах төлөвтэй байна.